Си и Путин демонстрираат блискост: „Заедно градиме нов глобален поредок“

Кинескиот претседател Си Џинпинг го нарече рускиот колега Владимир Путин „свој добар пријател“ на почетокот од нивната средба во Пекинг, пренесуваат светските агенции. Двајцата лидери нагласија дека односите меѓу Кина и Русија претставуваат пример за „соседско пријателство, сèопфатна стратешка координација и заемно корисна соработка“.

— реклама —

Путин изјави дека Москва е подготвена да го зајакне стратешкото партнерство со Пекинг и да ја продолжи интензивната комуникација на највисоко ниво. „Односите меѓу нашите земји се без преседан“, истакна рускиот претседател.

— реклама —

Си Џинпинг, пак, ја поздрави „потполната стратешка соработка“ меѓу двете држави и ја изрази волјата за заедничка изградба на „праведен и разумен глобален систем на управување“. Тој остро ги осуди „чиновите на заплашување“ и „менталитетот на студената војна и блоковската конфронтација“, кои, како што рече, се закана за стабилноста.

Состанокот се одржа во време на зголемени глобални тензии. Путин претходно учествуваше на регионалниот самит во Тјанџин, а во среда ќе присуствува на големата воена парада во Пекинг по повод 80-годишнината од завршувањето на Втората светска војна и капитулацијата на Јапонија.

— реклама —

„Секогаш сме биле заедно тогаш и остануваме заедно и сега“, порача Путин, додавајќи дека присуството на парадите во Москва и Пекинг е почит кон придонесот на двата народа во победата над фашизмот.

И Кина и Русија се наоѓаат во заострени односи со Западот и САД. И покрај средбата на Путин со американскиот претседател Доналд Трамп во Алјаска во август, нема знаци за приближување во ставовите околу Украина. Истовремено, односите меѓу Кина и САД се дополнително оптоварени поради трговската војна и воведените царини, додека Европа и натаму го критикува Пекинг за поддршката кон Москва во текот на конфликтот во Украина.