Претседателката на државата, Гордана Сиљановска-Давкова, во своето обраќање на Светскиот самит на лауреати што се одржува во Дубаи, во пресрет на Светскиот самит на владите, порача дека промените во современиот свет неминовно бараат и длабока промена во образованието, со поинакво согледување на реалноста – низ очите на новите генерации. Таа истакна дека во време на забрзан развој на вештачката интелигенција, образованието повеќе не смее да се сведува на еднонасочно пренесување и меморирање факти, туку мора да се насочи кон развој на критичкото и креативното размислување.
На еминентниот собир, на кој учествуваат околу 150 врвни научници, меѓу кои нобеловци и раководители на истражувачки институции од целиот свет, претседателката оцени дека традиционалниот образовен модел е надминат и недоволен за предизвиците на Четвртата индустриска дигитална револуција. Таа нагласи дека денешните ученици и студенти припаѓаат на дигитални и аудиовизуелни генерации кои учат, размислуваат и комуницираат поинаку од претходните, додека образовните системи сè уште функционираат според модели создадени за сосема поинаков, линеарен свет.
Сиљановска-Давкова посочи дека образованието денес се претвора во триалог меѓу наставникот, ученикот и вештачката интелигенција, што го прави процесот на учење подинамичен и посложен. Во тој контекст, таа порача дека вештачката интелигенција не смее да биде забранета, но мора да биде јасно и одговорно регулирана, поради ризиците што ги носи, особено опасноста од зависност и создавање нови облици на нееднаквост. Според неа, клучно е да се постигне глобален консензус дека вештачката интелигенција во образованието и во секојдневниот живот мора да биде транспарентна, правична и водена од човекот.
Во своето излагање, претседателката нагласи дека образованието треба да се насочи кон области во кои вештачката интелигенција има ограничувања, како што се менталната стабилност, емоционалната интелигенција и етичкото и моралното расудување. Таа предупреди дека доколку знаењето и технологијата останат во рацете на мал број актери, постои опасност од создавање ново „дигитално селанство“, со продлабочување на социјалните и економските разлики.
Осврнувајќи се на состојбите во земјата, Сиљановска-Давкова оцени дека ваква промена на парадигмата е неопходна и во македонскиот образовен систем, кој, како што рече, сè уште функционира според застарени модели и бележи слаби резултати. Сепак, таа изрази уверување дека Македонија располага со значаен човечки потенцијал, посочувајќи на научници кои се меѓу најцитираните во светот и на силното присуство на жени во STEM-областите.
Претседателката порача дека науката не познава мали и големи држави, туку само мали и големи идеи, и упати отворен повик за меѓународна соработка. Таа истакна дека Македонската академија на науките и уметностите, како и универзитетите и факултетите во земјата, се отворени за заеднички истражувачки и развојни проекти, нагласувајќи дека токму преку соработка, размена на знаења и совети може да се изгради образование што ќе одговори на предизвиците на иднината.
