Претседателката Гордана Сиљановска-Давкова денеска се сретна со претседателката на Европската комисија, Урсула фон дер Лајен, која престојува во посета на Македонија. На средбата биле разгледани евроинтегративниот процес, реформите и прашањето за надминување на спорот со Бугарија.
Сиљановска-Давкова изразила благодарност за зголемениот интерес и посветеноста на Европската Унија кон регионот, посочувајќи го и придонесот на Фон дер Лајен во забрзувањето на регионалните евроинтеграциски процеси.
Според претседателката, Македонија, имајќи ги предвид техничката подготвеност и усогласеноста со европската надворешна и безбедносна политика, заслужува да биде меѓу државите од регионот со најголем напредок, наместо, како што оцени, да биде на споредна патека.
Сиљановска-Давкова оцени дека причината за тоа што Македонија не е меѓу најуспешните во процесот е давањето предност на билатералниот спор пред Копенхашките критериуми.
Таа изразила уверување дека гарантирањето исти можности за Македонија како оние за Украина и Молдавија би ја зајакнало институционалната подготвеност и би ја обновило довербата и мотивацијата за европеизација, што, според неа, би го забрзало реформскиот курс.
Претседателката потсетила и на потребата од одржување политичка меѓувладина конференција, согласно новата методологија и Преговарачката рамка, како и на редовен состанок на Советот за стабилизација и асоцијација.
Фон дер Лајен, од своја страна, истакнала дека местото на Македонија е во Европската Унија и дека Брисел ќе продолжи да ја поддржува земјата на реформскиот и евроинтеграцискиот пат. Таа досегашните реформи ги оценила како импресивни.
Во однос на застојот во процесот, Фон дер Лајен посочила дека е неопходна деблокада на напредувањето кон ЕУ и изразила уверување дека македонско-бугарскиот спор може да се надмине преку интензивни и сестрани средби и дијалог, кои, како што нагласила, треба да започнат што е можно поскоро.
