Силното невреме што денеска го зафати Кипар предизвика низа проблеми низ островот, меѓу кои повреден човек по удар на гром, поплавени улици, прекини во снабдувањето со електрична енергија и нарушувања во воздушниот сообраќај. Најмалку 11 летови биле пренасочени поради обилните врнежи и лошите временски услови.
Четириесет и петгодишен маж се здобил со полесни изгореници на рамото откако гром удрил во негова близина, додека излегувал од капела во Като Дрис. Според заменик-шефот на полицијата во Ларнака, Џорџ Фукарис, инцидентот се случил околу 13 часот.
Мажот, државјанин на Шри Ланка, се обидувал да влезе во автомобил со уште две лица кога громот удрил во негова близина. Тој бил пренесен во Одделот за итна медицинска помош во Општата болница во Ларнака.
Невремето предизвикало проблеми и во електроенергетската мрежа. Повеќе области останале без струја откако громови ја оштетиле опремата на Кипарската управа за електрична енергија.
Проблеми биле регистрирани во Фамагуста, Никозија, Ларнака и Пафос, додека Лимасол не бил погоден. Екипите биле ставени во состојба на подготвеност и работеле на отстранување на последиците.
„Ќе биде потребно време. Проблемот нема да се реши со магија“, изјавила портпаролката на Управата, Кристина Пападопулу, повикувајќи ги граѓаните на трпение.
Невремето го нарушило и воздушниот сообраќај над островот. Најмалку 11 летови биле пренасочени бидејќи, поради силните врнежи и невремето, авионите не можеле безбедно да се приближат до Кипар.
Првиот пренасочен лет бил од Данска кон Пафос, но наместо таму слетал на Родос. Уште 10 летови, кои требало да пристигнат на аеродромот во Ларнака меѓу 12 и 13:30 часот, биле пренасочени кон Пафос, Родос и Либан.
