„Синдикалните членарини не смеат да служат за привилегирани патувања и луксузни игри на Јадранот“, вели Петрушевски

Пратеникот на ВМРО-ДПМНЕ, Бране Петрушевски, на денешната прес-конференција упати критики кон раководствата на УПОЗ и ССМ, обвинувајќи ги за ненаменско трошење на средствата собрани од синдикалните членарини.

— реклама —

Според Петрушевски, синдикалните организации треба да бидат насочени кон заштита на работничките права и подобрување на стандардот на членовите, а не кон организирање на скапи патувања и настани надвор од државата.

„Синдикалните членарини не смеат да служат за привилегирани патувања и луксузни игри на Јадранот. Работниците во Македонија заслужуваат чесно, одговорно и транспарентно синдикално претставување, а не раководства кои од нивните членарини организираат скапи патувања и луксузни спортски настани надвор од Македонија“, изјави Петрушевски.

— реклама —

Тој тврдеше дека претседателот на УПОЗ, Трпе Деаноски, со средства од синдикатот организирал четиридневни спортски игри во Чањ, Црна Гора, и побара јавно да одговори дали е точно дека на настанот предност имале членови на синдикатот кои учествувале на протестите заедно со него и со претседателот на ССМ, Слободан Трендафилов.

— реклама —

Петрушевски оцени дека синдикалните раководства се оддалечуваат од потребите на членството и, наместо да се борат за подобри услови за работниците, се занимаваат со активности кои, според него, не се во интерес на синдикалците.

„Деаноски и Трендафилов треба повеќе да работат и да се трудат да го полнат џебот на работниците, а не да живеат на сметка на истите“, порача Петрушевски.

— реклама —

Од УПОЗ и ССМ засега нема реакција на изнесените обвинувања.