Патниците во автобусите во Сингапур наскоро би можеле да се соочат со високи парични казни за однесување што досега најчесто било регулирано со правила на превозниците.
Новите прописи предвидуваат казни од речиси 400 американски долари за ставање нозе на седиштата, пуштање гласна музика, јадење или пиење во автобус, како и за фрлање отпад.
За посериозни прекршоци, како попречување или загрозување на другите патници во автобуски терминали, како и валкање на автобус, автобуска станица или терминал, казните може да достигнат до 5.000 долари.
Од Управата за копнен транспорт (LTA) велат дека целта на новите правила е да се создаде побезбедна и попријатна средина за сите корисници на јавниот превоз.
Досега, правилата во автобусите главно биле дел од внатрешните политики на превозните компании. Возачите можеле да побараат од патникот да го напушти автобусот доколку се однесува несоодветно.
Со новите прописи, ваквото однесување станува официјален прекршок за кој може веднаш да биде изречена парична казна. Спроведувањето ќе го вршат контролори или службеници на крајните постојки, а во одредени случаи возачите ќе можат да побараат и интервенција од полицијата.
Новите правила се усогласуваат со веќе постојните прописи што важат за железничката мрежа MRT во Сингапур.
