Здравствената состојба на осудениот поранешен командант на Војската на Република Српска, Ратко Младиќ, и натаму е сериозно нарушена, тврди неговиот син Дарко Младиќ, кој изјави дека неговиот татко е сè послаб и сè потешко комуницира.
„Сè е послаб и сè потешко зборува. Таму не може да добие соодветна нега. Понекогаш има подобри денови, понекогаш полоши, но генерално неговата состојба се влошува“, изјави Дарко Младиќ за РТРС.
Тој посочи дека семејството има големи очекувања од претстојната седница на Советот за безбедност на Обединетите нации, каде што, како што рече, ќе биде отворено и прашањето за правото на лекување.
„Србија сигурно ќе побара јавно да се разговара зошто во овој случај се применуваат различни стандарди во однос на другите осудени лица“, рече Дарко Младиќ, додавајќи дека семејството нема да се откаже од правната борба.
Тој наведе дека барања биле испратени до надлежниот комитет од страна на Србија, семејството и одбраната, со цел да се обезбеди еднаков третман и почитување на правилата.
„Ќе ги искористиме сите правни механизми што ни стојат на располагање за да ја постигнеме целта“, порача тој, најавувајќи дека доколку здравствената состојба дополнително се влоши, повторно ќе биде поднесено барање Ратко Младиќ да биде пуштен на лекување во Србија.
Министерот за правда на Србија, Ненад Вујиќ, вчера изјави дека ова прашање ги надминува политичките и правните рамки и, пред сè, се однесува на почитувањето на основните човекови права. Тој најави дека Србија ќе го отвори ова прашање и на седницата на Советот за безбедност на ОН, посветена на работата на Хашкиот механизам.
И покрај повеќекратните барања и, според српските власти, тешката здравствена состојба на Младиќ, Меѓународниот резидуален механизам за кривични трибунали досега во повеќе наврати ги одби барањата тој да биде привремено пуштен на лекување во Србија.
