Семејството на Ратко Младиќ и властите во Република Српска упатија итен хуманитарен апел до Меѓународниот суд во Хаг, барајќи негово итно пуштање на лекување во Србија поради критичната здравствена состојба.
Здравствената состојба на генералот Ратко Младиќ останува загрижувачка и непроменета, потврди неговиот син Дарко Младиќ, обвинувајќи го Трибуналот во Хаг за намерно одолговлекување на одлуката за негово привремено ослободување.
„Се плашам дека тоа ќе биде предоцна. Тој веќе трпи сериозни последици од мозочен удар, а тие веројатно ќе бидат трајни. Сите се согласуваат дека е при крајот на својот живот; се обидуваме само да му го продолжиме барем малку и последните денови да ги помине со семејството“, изјави Младиќ.
Семејството потенцира дека дополнителен проблем претставува тоа што Младиќ во притворската единица нема со кого да разговара на мајчин јазик, што е клучно за неговата когнитивна состојба по претрпените мозочни удари, и стравуваат дека биолошкиот часовник на генералот истекува побрзо од правните процедури.
Ратко Младиќ е поранешен воен командант на војската на Република Српска за време на војната во Босна и Херцеговина (1992–1995). Тој беше правосилно осуден на доживотен затвор од страна на Меѓународниот кривичен трибунал за поранешна Југославија во Хаг за геноцидот во Сребреница во 1995 година, каде што беа убиени околу 8.000 муслимански мажи и момчиња, злосторства против човештвото, прогон, истребување, убиства, депортација и присилно преместување на несрпското население и кршење на законите и обичаите на војување.
Осуден е за опсадата на Сараево, која траеше 43 месеци, при што цивилното население беше подложено на гранатирање и снајперски напади. Исто така, прогласен е за виновен за држење на мировниците на ОН како заложници во 1995 година.
