Ратко Младиќ ќе остане во затвор, откако Судот на Обединетите нации за воени злосторства во Хаг го одби неговото барање за предвремено ослободување од хуманитарни причини.
Младиќ, кој има 84 години и издржува доживотна затворска казна, барал ослободување поради сериозно нарушена здравствена состојба. Судот оценил дека иако се наоѓа во „последната фаза од животот“, тоа не претставува доволна основа за ослободување.
Во одлуката се наведува дека во затворската единица на ОН во Хаг му е обезбедена соодветна медицинска нега и дека нема дополнителен третман кој би можел да го добие надвор од Холандија.
Одбраната на Младиќ претходно побара итно привремено или условно ослободување, наведувајќи дека неговата здравствена состојба е критична и дека треба да биде сместен во болница каде што се зборува српски јазик.
Младиќ беше осуден на доживотен затвор во 2017 година, а пресудата беше потврдена во 2021 година. Тој беше прогласен за виновен за геноцидот во Сребреница, во кој беа убиени повеќе од 8.000 бошњачки мажи и момчиња, како и за злосторства против човештвото и терор врз цивилното население за време на опсадата на Сараево.
За време на војната во Босна и Херцеговина од 1992 до 1995 година загинаа повеќе од 100.000 луѓе, а околу два милиони беа раселени.
