Здравствената состојба на генералот на Војската на Република Српска, Ратко Младиќ, е непроменета и сè уште многу лоша, изјави неговиот син Дарко Младиќ.
„Нема промени ниту на полошо ниту на подобро, состојбата е повеќе или помалку иста, како да се стабилизирала, но е полоша отколку што беше пред мозочните удари. Неговата состојба е многу лоша“, изјави Дарко Младиќ за Радио-телевизијата на Република Српска.
Тој посочи дека вчера телефонски разговарал со својот татко, кој речиси не може да зборува.
„Потребен му е подолг контакт во живо на мајчин јазик за да може подобро да се види состојбата. Денеска ќе го посети претставник на Владата на Србија за човекови права, а следната седмица веројатно некој од нас ќе замине кај него“, најави Дарко Младиќ.
Тој додаде дека сè уште не пристигнал одговор од Обединетите нации на писмото испратено откако Меѓународниот механизам за кривични судови во Хаг одбил Ратко Младиќ да биде пуштен на лекување во Србија.
„Писмата пристигнаа до комисиите, тоа обично оди бавно и ќе потрае. Важно е што нашите барања се примени и што почнале да ги разгледуваат, што за тие институции е многу брзо“, рече Дарко Младиќ.
Тој наведе и дека во петокот пристигнала нова документација од лекарите од Хаг, која денеска ќе ја разгледуваат српски лекари.
„Во документацијата нема ништо посебно во врска со дијагнозата, но ги очекуваме снимките што ни беа ветени, по што нашите лекари ќе дадат свое мислење. Важно е што почна да пристигнува документацијата, бидејќи така ќе имаме поажурен увид“, истакна Дарко Младиќ.
