Сипаници кај овци и кози: АХВ спроведува контроли, се разгледува можноста за вакцинација

Агенцијата за храна и ветеринарство (АХВ) ги засилува контролите на терен по појавата на сипаници кај овци и кози и навремено презема мерки за спречување на ширењето на болеста.

— реклама —

Од АХВ информираат дека преку ветеринарните друштва со кои имаат склучено договори добиваат информации за појава на болеста во одгледувалиштата. По пријавувањето се земаат примероци од животните, вклучително крв и брисеви, за лабораториско испитување на присуство на вирусот.

Доколку болеста биде потврдена, директорот на АХВ донесува решение за спроведување контролни и заштитни мерки, по што се пристапува кон евтаназија на заболените животни и нивно соодветно закопување.

— реклама —

АХВ посочува дека континуирано ја следи состојбата на терен и ги презема потребните мерки за контрола на болеста.

— реклама —

Во однос на можноста за вакцинација, АХВ доставила информација до Европската комисија и до Турција за можноста за донација на вакцини. Експертската група продолжува со состаноци и разгледување на соодветните мерки, а повторно е побарана и помош од EUVET тимот на Европската комисија.

Од АХВ појаснуваат дека доколку биде одобрена вакцинацијата, најпрво ќе се испитаат безбедноста и чистотата на вакцината, по што би започнала вакцинацијата.

Агенцијата предупредува дека сточарите не смеат самостојно да вакцинираат животни. Секоја вакцинација на сопствен трошок без претходно одобрение од АХВ ќе биде санкционирана, а за заболените животни нема да се исплаќа компензација, односно обештетување за одземените животни.