Системот „Безбеден град“ почна да функционира и во охридскиот регион

Камерите од системот „Безбеден град“ се ставени во функција на автопатската делница кај Ново Село во Општина Дебрца, а во наредниот период ќе бидат активирани и на други фреквентни сообраќајници во охридскиот регион.

— реклама —

Од СВР Охрид информираат дека денеска е извршено финалното техничко тестирање на безбедносните камери, кои се дел од современиот систем за сообраќаен надзор „Безбеден град“ (Safe City), што на национално ниво официјално започна со работа на 1 февруари годинава.

— реклама —

По завршувањето на тестирањата, стручните екипи ги активирале камерите на автопатскиот потег кај Ново Село, а во следниот период се очекува системот да профункционира и на делницата меѓу селата Горенци и Требеништа, како и на останатите пофреквентни сообраќајници во регионот и на коридорите 8 и 10.

Од полицијата нагласуваат дека камерите во моментов не вршат санкционирање на возачите, бидејќи системот сè уште се наоѓа во завршна фаза на техничка проверка.

— реклама —

Според најавите, „Безбеден град“ ќе овозможи постојан надзор на сообраќајот, побрзо детектирање на прекршоците, подобрување на сообраќајната дисциплина и намалување на бројот на сообраќајни незгоди.

— реклама —

Од СВР Охрид апелираат до возачите доследно да ги почитуваат сообраќајните правила и прописи, особено ограничувањето на брзината на делницата кај Ново Село, каде максимално дозволената брзина изнесува 100 километри на час.