Министерот за здравство, Венко Филипче, разговарал со приватните клиники да ги намалат цените за лекување на пациенти со коронавирус. Според него, од „Систина“ биле децидни дека тоа не може да го направат бидејќи немаат економска логика, а од „Жан Митрев“ кажале дека ќе види дали може да ги намали цените.
„Вчера имав состанок со медицинските директори на трите приватни болници, на ‘Ремедика’ каде не се лечат ковид пациенти, на ‘Жан Митрев’ и ‘Систина’. Најпрво зборувавме за кадарот, веќе од утре треба да ни биде на располагање, а тоа се пет лекари од Систина’, двајца од болницата ‘Ремедика’ и веројатно еден од ‘Жан Митрев’, иако првичната најава беше дека се голем број од здравствениот кадар на боледување, дека ќе можат да пренасочат еден лекар да биде на располагање. Втората тема на разговорот беа цените. Иако апелирав тоа да се направи бидејќи е криза, бидејќи е пандемија, бидејќи е специфично прашање насекаде во светот, доктор Жан Митрев изрази спремност и рече дека денеска ќе потврди дали ќе ги намали цените за одреден процент, а од ‘Систина’ јасно ми кажаа дека тоа не можат да го направат бидејќи немале економска логика. Формално-правно немаме никаков механизам да коригираме цени“, кажа Филипче пред новинарите.
