Скопјани револтирани од јавниот превоз: Автобуси нема, а оние што доаѓаат се преполни

Скопјани и утрово се соочија со проблеми во јавниот градски превоз, со долго чекање на автобуските постојки и преполни возила. Според реакциите на граѓаните, приватните превозници повторно сообраќале нередовно, додека автобусите на ЈСП доцнеле или пристигнувале исполнети до последното место.

— реклама —

На линијата број 23, патници тврдат дека чекале повеќе од еден час без да пристигне автобус. Проблеми имало и кај Железничката станица, каде што автобусите на линиите 5, 15А и 27 биле толку преполни што дел од патниците не можеле да се качат.

— реклама —

Реакции имало и од жителите на Волково. Според објави во локалните групи на социјалните мрежи, приватните превозници утрово речиси и не сообраќале. Еден жител посочил дека чекале автобус од 6:15 часот, а првиот автобус на ЈСП од Средсело кон Лепенец заминал околу 6:47 часот.

— реклама —

Проблемите со јавниот превоз во Скопје се повторуваат со години, во услови на спорови меѓу Град Скопје, ЈСП и приватните превозници. Во јуни 2025 година приватните превозници штрајкуваа два дена поради неисплатен долг од над 150 милиони денари, а во октомври истата година го скратија возниот ред поради нов спор околу долг од 90 милиони денари. Во февруари 2026 година, прекин во сообраќајот имаше и поради дефект на опремата за следење и валидаторите во автобусите.

Граѓаните повторно бараат надлежните институции да најдат трајно решение, бидејќи нередовните линии, доцнењата и метежот на постојките им го отежнуваат секојдневното движење низ главниот град.