Скопје девет дена ќе биде европски центар на танцот - Започна IDO European Dance Championship 2026

Скопје од денеска е домаќин на IDO European Dance Championship 2026, голем европски танцов настан кој до 29 септември ќе се одржува во Т-Арена, во рамки на Спортскиот центар „Борис Трајковски“.

— реклама —

Во текот на деветдневното првенство во македонската престолнина ќе настапат повеќе од 2.900 танчери од бројни европски земји. Учесниците ќе се натпреваруваат во различни танцови дисциплини и категории, претставувајќи ги своите земји и најдобрите танцови достигнувања.

— реклама —

Покрај натпреварувачите, во Скопје пристигнуваат и тренери, судии и делегации, како и публика од различни земји. Првенството претставува можност за културна размена и поврзување на различни традиции и генерации преку танцот.

Настанот има значење и за туристичката понуда на Скопје и Македонија, бидејќи се очекува зголемена посетеност на хотелите, угостителските објекти и туристичките содржини во периодот на одржување на првенството.

— реклама —

Како еден од централните настани е најавена Парадата на нациите, која ќе се одржи на 25 септември во 14:30 часот. Учесниците тогаш ќе ги претстават своите земји во духот на пријателството, почитта, културната размена и заедништвото.

IDO European Dance Championship 2026 ќе трае до 29 септември, а во следните денови Скопје ќе биде исполнет со танц, енергија и младост.