Скопје е домаќин на светски шампиони и европски медалисти на „Златен гонг“

Светски шампион, европски прваци и бројни медалисти од меѓународни натпреварувања се дел од јубилејното 55. издание на боксерскиот турнир „Златен гонг“, кој од 13 до 15 ноември се одржува во салата „Расадник“ во скопската општина Кисела Вода.

— реклама —

На турнирот настапуваат 89 боксери и боксерки од 20 земји, а организатор е Македонската боксерска федерација.

Меѓу најголемите имиња е Украинецот Јуриј Захарјејев, сениорски светски шампион од Белград во 2021 година. Во Скопје настапува и Данило Жасан, бронзен медалист од Светското првенство во Ливерпул во 2025 година. Украинската репрезентација ја предводат и Џамал Кулијев, европски шампион до 23 години од 2024 година, и Матвиј Ражба, европски шампион до 17 години од 2019 година.

— реклама —

Во женска конкуренција настапува Ирина Луцак, освојувачка на европско злато до 23 години во 2024 година и сениорска европска бронза во Софија во 2026 година. Нејзина противничка во четвртфиналето во категоријата до 80 килограми е македонската боксерка Марија Костовска. Во украинскиот состав се и европската шампионка до 23 години Наталија Меринова и Анастасија Сарањук.

— реклама —

Силни претставници имаат и Литванија, Молдавија, Бугарија, Србија и Косово, меѓу кои се европски шампиони и медалисти од континентални и светски натпреварувања.

Полуфиналните борби се закажани за денеска, сабота, 14 ноември, со почеток во 14 часот, додека финалните борби ќе се одржат утре, недела, од 17 часот, во салата „Расадник“.

— реклама —

Влезот е слободен, а Македонската боксерска федерација ги повикува љубителите на боксот да ги проследат натпреварите и да им дадат поддршка на домашните натпреварувачи.