Скопје ќе донира 1,2 милиони денари за помош на Венецуела

Град Скопје ќе додели финансиска помош во износ од 1.200.000 денари за справување со последиците од разорниот земјотрес што ја погоди Венецуела, соопшти градоначалникот Орце Ѓорѓиевски.

Тој истакна дека Скопје добро знае што значи да се преживее катастрофален земјотрес, потсетувајќи на трагедијата од 1963 година, кога градот добил поддршка од бројни земји ширум светот, меѓу кои била и Венецуела.

— реклама —

„Токму затоа, денес кога народот на Венецуела се соочува со последиците од оваа катастрофа, Скопје возвраќа со човечност, почит и поддршка“, порача Ѓорѓиевски.

— реклама —

Од Град Скопје наведуваат дека финансиската помош претставува чин на солидарност кон пријателскиот народ на Венецуела и поддршка за справување со последиците од природната катастрофа.

Воедно, градоначалникот изрази сочувство до семејствата на загинатите и им посака брзо закрепнување на повредените.

— реклама —

„Скопје беше изградено благодарение на солидарноста на светот, а Венецуела беше меѓу земјите што тогаш подадоа рака. Тоа не се заборава. Скопје памети, сочувствува и помага“, истакна Ѓорѓиевски.