Градоначалникот на Скопје, Орце Ѓорѓиевски, најави организирање на летен наставно-научен едукативен камп наменет за учениците од средните училишта во главниот град.
Кампот ќе се одржи во Охрид во периодот од 19 до 31 август и ќе им понуди на средношколците можност да стекнат нови знаења, да развиваат креативност и лидерски вештини, но и да создадат нови пријателства и незаборавни искуства.
„Знаењето е најголемата инвестиција во иднината, а наша обврска е на младите да им отвориме што повеќе врати. Да им дадеме простор да прашуваат, да истражуваат, да се натпреваруваат со идеи, да работат во тим и да веруваат во себе“, порача Ѓорѓиевски.
Во рамките на кампот ќе бидат организирани научно-истражувачки работилници, едукативни предавања, интерактивни дискусии, тимски проекти, културно-историски посети и спортски активности.
Според градоначалникот, најважната цел е младите да почувствуваат дека знаењето не е само оценка во дневникот, туку сила што отвора можности, гради карактер и создава иднина.
„Скопје мора да вложува во своите млади, затоа што токму тие се енергијата, идејата и иднината на нашиот град“, истакна Ѓорѓиевски.
