Скршен нос и повеќе модринки кај пациент, петмина болничари осомничени за насилство во психијатриско одделение во Зеница

Обвинителството во Зеничко-добојскиот кантон побара притвор за петмина медицински техничари од Кантонската болница во Зеница, Босна и Херцеговина, кои се осомничени дека заедно злоставувале пациент во психијатриското одделение.

— реклама —

Според обвинителството, постои основано сомнение дека на 5 ноември, додека биле на работа во Одделот за машка итна психијатрија, без причина физички го малтретирале пациентот, притоа нарушувајќи ја безбедноста и мирот на другите пациенти.

Предлогот за притвор за осомничените со иницијали М. Б., В. Х., Д. М., Л. К. и С. С. е доставен до судијата за претходна постапка на Општинскиот суд во Зеница.

— реклама —

Повредите кај пациентот биле утврдени дури на 11 ноември, при лекарски преглед во Одделот за итна медицина. Дијагностицирани биле скршеници на носните коски, модринка под левото око, траги од удари во пределот на градите, долниот дел од грбот и левата потколеница, како и модринки на двете надлактици и десната потколеница. Обвинителството ги квалификува повредите како лесни телесни повреди.

— реклама —

Петмината се осомничени за кривично дело насилно однесување и соизвршителство. Притворот е побаран поради опасност од влијание врз сведоци и докази, како и можност за повторување на делото. Одлуката сега е во рацете на судијата за претходна постапка.

Медицинските техничари беа уапсени откако раководството на болницата поднело пријава во полиција и ја предало видеоснимката од настанот.

— реклама —

За сите осомничени важи презумпцијата на невиност сè додека нивната вина не биде утврдена со правосилна судска пресуда.