„Сликајте ме со ѕвезденото небо“: Пред 19 години Тоше го одржа својот последен концерт

Пред 19 години на денешен ден повеќе од 25.000 луѓе беа дел од една од најемотивните вечери во музичката кариера на Тоше Проески. На 5 октомври 2007 година, македонската музичка ѕвезда го наполни Градскиот стадион во Скопје и одржа голем хуманитарен концерт под мотото „Образованието е одговорност на сите“.

Концертот започна во 19:30 часот, а средствата од билетите беа наменети за петгодишен проект за основно образование поддржан од УСАИД. Со собраните средства требаше да се помогне во реновирањето на повеќе од 100 училишта низ Македонија, како и во подобрувањето на наставата, опремата и образовните програми.

— реклама —

Пред настапот, Тоше зборуваше за значењето што за него го имале хуманитарните концерти и можноста преку музиката да помогне.

„Сите концерти ми се драги, но хуманитарните многу ми значат оти остануваат трајно“, изјави тој, посочувајќи дека подоброто образование значи и поздраво општество.

На сцената му се придружија и негови музички пријатели од регионот – Антонија Шола, Бојан Маровиќ, Марија Шестиќ и Адријан Гаџа.

— реклама —

Тоше ги испеа своите големи хитови, меѓу кои „Игри без граници“, „Никој како тебе не бакнува“, „Боже, чувај ја од зло“, „Душа остана“, „Месечина“, „Громови на душа“, „Цреша“, „По тебе“, „Рани на усните“, „Соба за тага“, „Ако ме погледнеш во очи“, „Лагала нас мала“, „Срце није камен“, „Студена“, „Вежи ме за себе“, „Кој ли ти гризе образи“, „Среќна ли си ти“, „Љубена“, „Твоите бакнежи“, „Во коси да ти спијам“, „Најдрага моја“ и „Несаница“.

Посебно емотивни беа заедничките настапи со гостите. Со Антонија Шола ја изведоа „Волим осмех твој“, со Бојан Маровиќ „Тајно моја“, со Марија Шестиќ „Река без имена“ и „Simply The Best“, а со Адријан Гаџа „Сам се лажам“.

— реклама —

Концертот траеше повеќе од два часа, а еден од моментите што останал во сеќавање бил оној кога Тоше ѝ се обрати на публиката со зборовите: „Сликајте ме со ѕвезденото небо“. Илјадници запалени мобилни телефони и запалки го осветлиле стадионот, создавајќи сцена која и денес се памети.

По концертот, на Тоше и неговите гости им беа доделени статуетки „Мајка Тереза“ за нивниот придонес во хуманитарната акција. Тоше својата статуетка ѝ ја предаде на мајка му Доминика.

Тоа беше негово трето полнење на Градскиот стадион во Скопје. Само 11 дена подоцна, на 16 октомври, Тоше трагично го загубил животот во сообраќајна несреќа кај Нова Градишка во Хрватска.

— реклама —

Денес, 19 години подоцна, 5 октомври останува датум кој има посебно место во музичката приказна на Тоше Проески. Неговиот последен концерт не бил само голема музичка вечер, туку и хуманитарен настан преку кој уште еднаш ја покажа својата посветеност кон луѓето.

Снимките од таа вечер остануваат драгоцен спомен за последното големо дружење на Тоше со скопската публика – вечерта во која илјадници луѓе пееја со него, без да знаат дека го слушаат неговиот последен концерт.