Случајот на Ива Михаилова меѓу темите на Петрова и Муцунски, бугарската министерка очекува брзо решение

Случајот со Ива Михаилова ќе биде една од темите на денешната средба меѓу бугарската министерка за надворешни работи Велислава Петрова и македонскиот министер за надворешни работи Тимчо Муцунски во Софија. Петрова пред средбата порача дека станува збор за хуманитарен случај кој треба да биде решен што е можно поскоро, пренесе БНТ.

— реклама —

„Станува збор за хуманитарен случај и важно е тоа да биде нагласено. Ние активно го поставивме прашањето за потребата случајот да биде решен што е можно поскоро, за да биде загарантирано здравјето на Ива“, изјави Петрова.

Таа како важен чекор ја оцени информацијата добиена по дипломатски пат за подготвеноста да се одржи медицински конзилиум, во кој би учествувале и бугарски лекари. Петрова изрази надеж дека тој ќе може да се реализира наскоро.

— реклама —

Нејзината изјава следува откако бугарските медиуми објавија дека Македонија дала согласност бугарски медицински специјалисти да ја прегледаат Михаилова. Следно треба да бидат определени лекарите и да се организира заеднички медицински преглед со македонски лекари.

— реклама —

Михаилова, која има бугарско и македонско државјанство, е обвинета во Македонија во врска со сообраќајна несреќа во која загина едно лице. По несреќата се здобила со сериозни повреди на ’рбетот, а бугарската страна подолг период бара да ѝ биде овозможено потребното лекување.

Петрова и Муцунски на средбата треба да разговараат и за европската интеграција. Бугарската министерка пред средбата изјави дека очекува отворен дијалог и напредок во односите меѓу двете земји.

Таа се осврна и на прашањето за враќањето на останките на цар Самуил, при што порача дека не очекува провокации и изрази надеж дека ќе има можност за отворен дијалог.