Судскиот процес за случајот „Онкологија“ продолжува денеска во Основниот кривичен суд во Скопје, каде што се води постапка против поранешниот директор на Клиниката за радиотерапија и онкологија, Нино Васев, како и онколозите Симонида Црвенкова и Драган Јакимовски.
Тројцата се обвинети за продолжени тешки дела против здравјето на луѓето и несовесно лекување пациенти. Обвинението го застапува јавната обвинителка Марија Ѓоргева од Основното јавно обвинителство – Скопје, а судењето го води судијката Снежана Марковска.
Во фокусот на претходното рочиште беше вештачењето на Владимир Даниловски, кој беше сослушан на предлог на одбраната. Тој објасни дека при изработката на вештачењето не го разгледувал прашањето дали лекарите правилно ја избрале онколошката терапија, туку можните последици што произлегле од применетото лекување.
Даниловски посочи дека, за да се утврди одговорност, потребно е медицински да се докаже дали кај пациентите настанала конкретна штета, дали терапијата придонела за влошување на нивната состојба или за забрзување на смртниот исход.
Особено важно, според него, е утврдувањето на причинско-последичната врска меѓу конкретната лекарска постапка и последицата кај пациентот. Самото отстапување од препораките или одредени правила за дозирање, како што објасни вештакот, не е доволно без медицински доказ дека токму тоа отстапување предизвикало конкретна штета.
Според обвинението, во случајот се опфатени 47 пациенти кај кои, наводно, биле применувани несоодветни терапии, со отстапувања во дозирањето и без соодветна процена на нивната здравствена состојба.
Во предметот првично беше обвинета и онкологот Мери Пешевска. Таа ја призна вината, по што беше осудена на две години условна казна затвор.
Денешното рочиште е продолжение на постапката во која треба да се утврдат фактите и евентуалната одговорност на обвинетите.
