Здравствени причини го одложија денешното судење за случајот „Онкологија“

Денешното судско рочиште за предметот „Онкологија“, кој се води пред Основниот кривичен суд Скопје, е одложено поради отсуство на судијката Снежана Марковска од здравствени причини.

— реклама —

Од Судот информираат дека следното рочиште е закажано за 25 ноември, според претходно утврдениот распоред.

На последното рочиште, одржано на 5 октомври, Обвинителството ги оспори заклучоците на вештакот на одбраната, Владимир Даниловски, во врска со терапијата применувана кај пациентите на Клиниката за онкологија. При вкрстеното испрашување беше побарано да објасни врз основа на кои официјални протоколи оценил дека применетата терапија била соодветна.

— реклама —

Одбраната, преку адвокатот Боби Спирковски, кој го застапува поранешниот директор на Клиниката, Нино Васев, оцени дека клучното прашање е дали терапијата ја влошила здравствената состојба на пациентите или предизвикала нивна предвремена смрт, а не изборот на конкретните лекови.

— реклама —

Во предметот, поранешниот директор Нино Васев и онколозите Симонида Црвенкова и Драган Јакимовски се обвинети за несовесно лекување пациенти. Постапката првично се водеше и против онкологот Мери Пешевска, која призна вина и беше осудена на две години условна казна затвор.

Според обвинението, кај 47 пациенти биле применети несоодветни терапии, со пропусти во дозирањето и без соодветна процена на нивната здравствена состојба. Лекарите се товарат за продолжени тешки дела против здравјето на луѓето и несовесно лекување.

— реклама —

Случајот го води судијката Снежана Марковска, а обвинението го застапува јавната обвинителка Марија Ѓоргева од Основното јавно обвинителство Скопје.