Триесет и деветгодишен маж почина по напад од ајкула на Големиот корален гребен, јужно од Кернс, во австралиската држава Квинсленд.
Несреќата се случила околу пладне по локално време, додека мажот наводно ловел риба на плиткиот гребен Кенеди Шоал, оддалечен околу 50 километри од брегот, објави „Гардијан“.
Станува збор за подрачје меѓу Кернс и Таунсвил, познато како популарна дестинација за рекреативен риболов и нуркање.
Според полицијата во Квинсленд, службите за итна помош биле повикани непосредно пред пладне, по дојава дека мажот бил нападнат од ајкула додека бил во вода.
Тој бил извлечен и во критична состојба пренесен до пристаништето „Хал Ривер Хедс“, во близина на градот Тали, но набргу потоа им подлегнал на повредите.
„Мажот беше извлечен од водата, но почина од здобиените повреди“, соопшти полицијата, додавајќи дека ќе биде подготвен извештај за судскиот вештак.
Засега не е познато кој вид ајкула стои зад нападот. Во водите долж Големиот корален гребен најчесто се среќаваат биковски и тигрести ајкули, додека големите бели ајкули се поретки во потоплите води.
Ова е втор смртоносен напад од ајкула во Австралија за краток период. Минатиот викенд маж почина и по напад кај островот Ротнест, во близина на Перт.
