На крузер што пловел низ Атлантскиот океан меѓу Аргентина и Зеленортските Острови избила сериозна здравствена криза, при што три лица починале, а повеќе патници се разболеле, со сомнеж за инфекција со хантавирус.
Според Светската здравствена организација, потврден е еден случај на инфекција, додека уште пет се водат како сомнителни. Од вкупно шест заболени, три лица починале, а едно се наоѓа на интензивна нега во Јужна Африка. Меѓу жртвите се брачен пар од Холандија на возраст од 70 и 69 години, додека третиот починат сè уште не е идентификуван.
Заразата е регистрирана на бродот MV Hondius, управуван од холандската компанија Oceanwide Expeditions. Крузерот неодамна бил закотвен во близина на Праја, главниот град на Зеленортските Острови, а се разгледува можноста за хоспитализација на дополнителни пациенти пред продолжување на патувањето кон Канарските Острови во Шпанија.
Здравствените власти во Јужна Африка претходно соопштија дека станува збор за „тешка акутна респираторна болест“. Портпаролот на Министерството, Фостер Мохале, потврди дека кај пациент во Јоханесбург е дијагностициран хантавирус.
Хантавирусите најчесто се пренесуваат преку контакт со урина или измет од заразени глодари, а во ретки случаи е можно и пренесување меѓу луѓе. Здравствените служби продолжуваат со координација за евакуација и третман на заболените.
