Снимале додека ја тепале и ѝ се заканувале: ОЈО поведе постапка против три девојки за врсничкото насилство во Куманово

Основното јавно обвинителство Куманово поведе постапка против 18-годишна девојка, а до судијата за деца при Основниот суд во Куманово поднесе барање за поведување подготвителна постапка против две малолетнички на возраст од 15 и 14 години, поради сомнение дека сториле кривично дело „насилство“.

— реклама —

Според Обвинителството, на 13 март годинава тие повикале 13-годишно девојче да излезе од дома, по што ја убедиле да влезе во запуштена просторија во близина на спортскиот центар „Соколана“ во Куманово.

— реклама —

Таму, како што се наведува, ја навредувале, физички ја нападнале удирајќи ја по лицето и телото, ја влечеле за коса, а целиот напад го снимале со мобилен телефон. По насилството, ѝ се заканиле дека ќе ја убијат доколку го пријави случајот или зборува за снимката.

— реклама —

Од Обвинителството информираат дека веднаш по објавувањето на видеото на социјалните мрежи биле преземени дејствија за обезбедување докази.

За полнолетната осомничена, јавниот обвинител предложил мерки на претпазливост, меѓу кои задолжително јавување во суд, привремено одземање на патната исправа и забрана за приближување и воспоставување контакт со жртвата.