Со европски средства ќе се реконструира одделението за физикална терапија во Гевгелија: Инвестицијата вредна над 200.000 евра

Со финансиска поддршка од Европската Унија ќе се реконструира објектот на Одделението за физикална медицина и терапија при ЈЗУ Општа болница со проширена дејност – Гевгелија. За реализација на проектот е склучен договор во вредност од 207.747,44 евра, а предвидениот рок за изведба е девет месеци.

— реклама —

Објектот се наоѓа во рамките на Негорските минерални извори, каде што функционира одделението за физикална медицина и терапија со секторите за физикална терапија, отсекот за хидротерапија и специјалистичката ординација.

— реклама —

Од Болницата посочуваат дека со реконструкцијата ќе се обезбедат современи и пофункционални услови за пациентите и здравствените работници, како и значително подобрена инфраструктура за обезбедување здравствени услуги.

„Со реконструкцијата ќе се создадат современи, функционални и поквалитетни услови за пациентите и здравствените работници, а одделението за физикална терапија ќе добие значително подобрена инфраструктура за обезбедување здравствени услуги. Оваа инвестиција претставува уште еден значаен чекор кон модернизација на нашата институција и унапредување на квалитетот на здравствената заштита за граѓаните на Гевгелија и пошироко во регионот“, изјави директорот на Болницата, д-р Патрик Матх.

— реклама —

Проектот се реализира во рамките на „IPASHIELD in motion“, во склоп на Interreg VI-A IPA програмата за периодот 2021–2027, која се спроведува во соработка со соседна Грција и со финансиска поддршка од Европската Унија.

Изведувач на градежните работи ќе биде „Техника ДООЕЛ Импорт-Експорт“ од Радовиш.