Министерот за животна средина и просторно планирање Муамет Хоџа, директорот на Центарот за управување со кризи Мухамед Али и Владимир Буревски од компанијата „Модирум платформс“ потпишаа меморандум за соработка за унапредување на раното откривање пожари и заштитата на животната средина.
Со меморандумот се воспоставува рамка за реализација на пилот-систем за видео мониторинг на депонии, кој преку современи камери, интелигентна видеоаналитика и вештачка интелигенција ќе овозможи навремено откривање чад, пожар и други ризици.
ЦУК ќе обезбедува 24-часовен мониторинг и ќе ги известува надлежните институции при идентификување ризик, со што се овозможува побрзо реагирање и подобра координација.
„Модирум платформс“ ќе обезбеди опрема за системот на привремено користење во период од една година, како дел од поддршката за иницијативи од јавен интерес.
Резултатите од пилот-фазата ќе бидат основа за разгледување на можностите за проширување на системот на национално ниво.
