Дивите депонии и податоците за загадувањето ќе се следат преку нови дигитални платформи, податоците ќе бидат јавни за сите граѓани

Податоците за загадувањето на воздухот, дивите депонии и проектите на Министерството за животна средина ќе бидат дигитализирани и достапни за сите граѓани преку пет нови платформи, најави министерот за животна средина Муамет Хоџа.

— реклама —

Платформите ќе овозможат поголема транспарентност, полесен пристап до информации и поедноставување на административните постапки, а податоците ќе се користат и во борбата против еколошкиот криминал.

— реклама —

Платформата „Темели“ ќе содржи информации за проектите на Министерството, нивната вредност, роковите, локациите и изворите на финансирање. Преку „Јадро“ ќе се дигитализира архивата и ќе се овозможи електронско следење на предметите, додека „Време“ е наменета за поедноставување на административните процедури. Од предвидените 30 чекори за поедноставување, 15 треба да бидат опфатени во првата фаза, до крајот на годината.

Платформата „Земја“ ќе овозможи дигитално мапирање на дивите депонии во општините, со цел полесно планирање на нивното расчистување. Нејзината реализација е предвидена во буџетот за 2027 година, а во неколку општини веќе се спроведува пилот-проект за видеонадзор на дивите депонии.

— реклама —

Петтата платформа, „Воздух“, ќе содржи дигитален регистар во кој 140 компании со А-интегрирани еколошки дозволи ќе ги објавуваат податоците за своите емисии. Регистарот е поврзан со Законот за контрола на емисиите во воздухот, кој треба да стапи во сила во септември 2027 година.

Хоџа најави дека сите пет платформи ќе бидат поединечно претставени во наредниот период, со детални информации за нивната намена и придобивките за граѓаните.