Со македонски фолклор и традиција заврши 17. Карпошово културно лето

Во дворот на црквата „Св. Троица“ во населбата Бардовци, во знакот на македонскиот фолклор и традиција, беше одбележана последната вечер од 17. издание на Карпошовото културно лето.

— реклама —

Вечерта започна со настапот на фолклорниот ансамбл „Етнос“, чии играорци со енергичните народни танци и ора ја збогатија атмосферата. Автентичните и колоритни македонски носии, заедно со звуците на традиционалниот народен мелос, беа во центарот на вниманието.

— реклама —

Публиката уживаше и во настапите на Зуица Лазова, Миле Кузмановски и Душко Георгиевски, кои со својот енергичен настап придонесоа за празничната атмосфера и го заокружија завршниот настан.

Пред присутните се обрати и градоначалникот на Општина Карпош, Сотир Лукровски, кој истакна дека културата, традицијата и обичаите остануваат живи сè додека луѓето ги носат во себе и ги пренесуваат на младите генерации.

— реклама —

Овогодинешното Карпошово културно лето понуди разновидна програма наменета за различни вкусови и генерации. Во рамки на манифестацијата настапија познати македонски музички имиња, млади рап-изведувачи и културно-уметнички друштва, а беа организирани и арт-презентации и филмски проекции во рамки на „кино на отворено“.

Со последната вечер исполнета со фолклор, музика и македонска традиција, заврши уште едно издание на Карпошовото културно лето.