Со над 84.000 книги и 5.000 читатели, тетовската библиотека „Кочо Рацин“ доби статус на универзитетска библиотека

Библиотеката „Кочо Рацин“ во Тетово доби статус на универзитетска библиотека, откако Владата ја усвои одлуката за проширување на нејзината дејност и трансформација на установата. Одлуката е донесена на предлог на Министерството за култура и туризам.

— реклама —

Од Министерството оценуваат дека ова е значаен чекор за Тетово како универзитетски центар и придонес кон унапредувањето на високото образование, науката и библиотечните услуги. Со новиот статус, библиотеката ќе овозможи поширок пристап до своите фондови и услуги за студентите, професорите и истражувачите.

Библиотеката годинава одбележува 80 години од основањето, а нејзиниот директор Бинас Пајазити вели дека иницијативата за добивање статус на универзитетска библиотека започнала пред пет месеци.

— реклама —

„Со ова ќе се добие надградба што ќе ни овозможи да добиваме научни списанија и да бидеме поблиску до научната фела и студентите“, вели Пајазити.

— реклама —

Тој посочува дека, согласно Законот за издаваштво, издавачките куќи автоматски ќе треба да доставуваат примерок од секоја издадена книга и до тетовската библиотека.

Планирано е и електронско поврзување со библиотеките на Универзитетот на Југоисточна Европа и на Државниот универзитет во Тетово, со цел нивните материјали да им бидат достапни на научниците, истражувачите и читателите преку библиотеката „Кочо Рацин“.

Установата располага со фонд од над 84.000 книги и има околу 5.000 редовни читатели.