Пратеничката од ВМРО-ДПМНЕ, Јулија Тушевска, на денешната седница на Комисијата за финансирање и Буџет изјави дека со ребалансот на Буџетот средствата се пренасочуваат кон проекти и политики што, како што рече, ќе донесат реални придобивки за граѓаните и економијата.
Таа нагласи дека средствата нема да останат неискористени на позиции кои нема да се реализираат, туку ќе бидат насочени таму каде што се најпотребни.
„Со овој ребаланс се врши пренасочување на средства таму каде што се најпотребни. Средствата не остануваат заробени во позиции кои нема да се реализираат, туку се насочуваат кон проекти и политики што ќе дадат реален ефект за граѓаните и за самата економија. Тоа е суштината на одговорно управување со јавните финансии“, рече Тушевска.
Таа оцени дека и покрај глобалните геополитички тензии, растот на цените на енергенсите и неизвесноста на меѓународните пазари, македонската економија бележи позитивни резултати.
Според Тушевска, во првиот квартал од 2026 година е регистриран реален економски раст од 3,1 проценти, градежништвото пораснало за 7,2 проценти, нискоградбата за 24,5 проценти, просечната нето-плата во март била повисока за 8,2 проценти, а странските директни инвестиции достигнале 218,6 милиони евра, што е речиси 47 проценти повеќе во споредба со истиот период минатата година.
Таа додаде дека со ребалансот вкупните приходи се проектирани на 379,5 милијарди денари, а расходите на 425,8 милијарди денари, при што дополнителните средства, како што истакна, ќе бидат наменети за исполнување на законските обврски, капитални инвестиции, образование, социјална заштита и локален развој.
