Пратеничката на ВМРО-ДПМНЕ, Јулија Тушевска, на денешната прес-конференција соопшти дека во изминатите две години, покрај стабилизацијата на земјоделскиот сектор, фокусот бил ставен на капитални инвестиции, модернизација и изградба на функционални институции.
Таа изјави дека биле наследени нереализирани кредити и проекти, меѓу кои кредитот од германската банка KfW во вредност од 80 милиони евра и проектот на Светската банка за модернизација на земјоделството, чија реализација, според неа, била под 10 проценти.
Таа истакна дека веќе е завршена постапката за избор на изведувач за логистичко-дистрибутивниот центар во Скопје, кој треба да биде изграден до крајот на 2027 година, додека во Струмица се подготвува изградба на современ центар за сортирање и складирање земјоделски производи.
Според Тушевска, се воспоставува и интегриран дигитален систем за управување со земјоделското земјиште, а досега се склучени повеќе од 2.100 договори за користење на околу 6.000 хектари државно земјиште. Дополнително, како што рече, ослободени се уште 2.000 хектари што наскоро ќе им бидат ставени на располагање на земјоделците.
Во областа на водостопанството, таа посочи дека се обезбедени 132 милиони денари финансиска поддршка во 2025 година, а површините под наводнување се зголемени од околу 14.000 на 17.700 хектари. Според неа, откочени се и повеќе инфраструктурни проекти, меѓу кои браните Конско и Речани, хидросистемот Равен – Речица, како и системите за наводнување Колибари, Сарај, Турија и Злетовица.
Тушевска додаде дека во шумарството е воведен нов дигитален систем за следење на шумските ресурси, а јавното претпријатие, според неа, од загуба преминало во добивка од 10 милиони денари. Во ловството се склучени 71 нов договор за концесија на ловишта, додека во Охридското Езеро повторно е реализирано порибување со околу еден милион единки охридска пастрмка.
Таа информираше и дека се подготвени нови законски решенија за земјоделското земјиште, земјоделството и руралниот развој, уредувањето на пазарите и шумите, како и воспоставување револвинг фонд за откуп на земјоделски производи.
„Од проекти што со години стоеле во место, денес имаме активни градилишта, нови инвестиции, модернизација и институции што работат во интерес на граѓаните“, истакна Тушевска.
