Со хебла влегол во куќа во Скопје, сосед го забележал и повикал полиција

Основното јавно обвинителство Скопје поведе постапка против дваесетгодишник од Гевгелија, кој е осомничен за кривично дело „Тешка кражба“ во обид, откако на 22 јули се обидел да ограби куќа во Скопје.

— реклама —

Според Обвинителството, осомничениот во раните утрински часови ја прескокнал оградата и влегол во дворот на куќата. Таму пронашол дрвени скали, ги потпрел на ѕидот и преку нив се качил до прозорецот од објектот. Со сила ја подигнал ролетната, а потоа со хебла го отворил прозорецот и влегол во куќата.

— реклама —

— реклама —

Откако влегол, почнал да пребарува и претура низ просториите, но бил забележан од сосед, кој веднаш ја известил полицијата. Полициските службеници пристигнале на местото и го затекнале осомничениот во куќата, по што го лишиле од слобода пред да успее да ја доврши кражбата.

Јавниот обвинител побарал да му биде определен притвор, оценувајќи дека постои опасност од бегство бидејќи осомничениот нема постојано живеалиште или престојувалиште во Скопје. Дополнително, според Обвинителството, тој и претходно се јавувал како сторител на имотни деликти, поради што постои и опасност да изврши нови кривични дела.