Македонското Собрание е домаќин на Третата регионална конференција посветена на улогата на парламентарниот надзор во процесот на пристапување кон Европската Унија. На конференцијата учествуваат претставници и експерти од парламентите од Западен Балкан.
На средбата се разговара за законодавната и надзорната функција, парламентарната дипломатија, административните капацитети, транспарентноста и улогата на парламентите во следењето на реформската агенда.
Потпретседателот на Собранието и претседател на Комисијата за европски прашања истакна дека европската интеграција е стратешка цел на земјите од Западен Балкан, а парламентите имаат клучна улога во спроведувањето на реформите и усогласувањето на законодавството со европското право.
Генералната секретарка на Собранието, Марина Димовска, порача дека парламентарниот надзор треба да биде „ефективен, професионален и транспарентен“.
Министерот за европски прашања, Беким Сали, истакна дека парламентите се во сржта на европската интеграција и нагласи дека брзината на реформите не треба да биде поважна од нивниот квалитет.
На конференцијата беа претставени и наодите од извештајот за примената на парламентарните принципи за 2025 година, со препораки за подобрување на надзорот, транспарентноста, административните капацитети, парламентарната дипломатија и комуникацијата со јавноста.
Конференцијата продолжува утре со дискусии за зајакнување на парламентарниот надзор врз реформската агенда и иднината на процесот на проширување на ЕУ.
