Собранието ги разгледува измените на Кривичниот законик за усогласување со европските стандарди

Собраниската Комисија за политички систем и односи меѓу заедниците денеска ќе расправа за измените и дополнувањата на Кривичниот законик, кои се предлагаат по скратена постапка и имаат цел да ги намалат ризиците поврзани со членството на Македонија во единствената европска платежна зона – СЕПА.

— реклама —

Со законските измени треба да се отстранат слабостите во постојните одредби и да се постапи согласно со препораките од евалуацијата на системот за спречување перење пари и финансирање тероризам, усвоена од Комитетот МАНИВАЛ во 2023 година, како и да се обезбеди усогласување со препораките на ФАТФ.

— реклама —

Пратеникот на ВМРО-ДПМНЕ, Антонио Милошоски, вчера образложи дека станува збор за ограничени измени на Кривичниот законик, додека новиот законски текст на кој се работи ќе биде доставен на мислење до Европската комисија. Тој побара поддршка од сите пратеници.

Милошоски посочи дека измените се однесуваат на зајакнување на одредбите за конфискација на имот, финансирање тероризам и кривичното дело перење пари. Според него, препораките за овие промени биле дадени уште во мај 2023 година од експертската група МАНИВАЛ при Советот на Европа.

— реклама —

Во Собранието денеска се закажани и две седници на Законодавно-правната комисија. На дневен ред се, меѓу другото, измените на Законот за надворешни работи, ратификација на договори со Советот на Европа, Албанија, Катар и Хрватска, како и измените на Законот за извршување на Буџетот за 2026 година.

— реклама —

Комисијата ќе разгледува и барање за автентично толкување на членот 34 од Законот за локалната самоуправа, поднесено од група пратеници.