Собранието денеска го усвои Законот за игрите на среќа и забавните игри, со кој се воведуваат нови правила за функционирањето на индустријата, вклучително и дислокација на објектите, ограничувања во рекламирањето и засилени механизми за контрола.
За законот гласаа 60 пратеници, додека 20 беа против.
Една од клучните новини е обврската објектите за приредување игри на среќа да бидат оддалечени најмалку 500 метри од основните и средните училишта. Целта на оваа мерка, според предлагачите, е да се намали достапноста на игрите на среќа за младите.
Со законските измени се воведуваат и значајни ограничувања во рекламирањето на оваа индустрија. Се укинуваат светлечките и агресивни реклами, а во иднина ќе биде дозволено само истакнување на називот на компанијата во строго определени димензии, без употреба на слогани и пораки што сугерираат лесна заработка или успех.
Дополнително, законот предвидува задолжително дигитално следење на работењето на приредувачите на игри на среќа, вклучително и GPS-поврзување на системите, како и пообемна контрола од страна на Управата за јавни приходи.
Со овие мерки се очекува да се обезбеди поголема транспарентност во работењето на индустријата и да се спречи нелегалното работење.
