Софија го драматизира случајот со Ива Михаилова од Кочани: Шест бугарски пратеници дојдоа на судењето

Шест пратеници од Бугарија денеска го следат рочиштето во Основниот суд во Кочани, во судскиот процес против 23-годишната Ива Михаилова, која има македонско и бугарско државјанство.

Михаилова е обвинета за кривичното дело „Тешки дела против безбедноста на луѓето и имотот во сообраќајот“, по сообраќајната несреќа што се случи во октомври минатата година. Во несреќата едно лице го загуби животот, а неколку други беа повредени, меѓу кои и самата Михаилова. Таа ја отфрла вината и тврди дека несреќата не настанала по нејзина вина.

— реклама —

Случајот предизвика големо внимание во Бугарија, особено по одлуката на Основниот суд во Кочани да го одбие барањето на Михаилова да ѝ бидат вратени личните документи, за да може да продолжи со лекување во Бугарија.

— реклама —

Судот го одби барањето со образложение дека не биле доставени потребните лекарски мислења дека таквото лекување не може да се спроведе во Македонија. Апелацискиот суд во Штип на 20 август ја потврди одлуката на кочанскиот суд.

По случајот реагираше и бугарското Министерство за надворешни работи, кое побара Михаилова да добие навремена и соодветна медицинска грижа.

— реклама —

На денешното рочиште присуствуваат пратеници од ГЕРБ, Прогресивна Бугарија и „Демократска Бугарија“. Тие најавија дека внимателно ќе го следат судскиот процес и ќе ја информираат бугарската јавност за неговиот тек.

— реклама —

Случајот предизвика реакции и во Софија, каде што денеска беше организиран и протест пред Амбасадата на Македонија, во знак на поддршка за Михаилова.

Ива Михаилова во изминатиот период доби значително внимание од бугарските институции. Бугарското Министерство за надворешни работи двапати се огласи за случајот, а бугарската претседателка Илијана Јотова најави дека прашањето ќе го отвори и на средба со генералниот секретар на Советот на Европа во Стразбур.