Компанијата Apple се соочи со тужба во САД поради наводна негрижа во спроведувањето на безбедносните мерки во продавницата за апликации App Store, откако тројца корисници тврдат дека преку лажна криптоапликација изгубиле повеќе од 1,8 милиони долари.
Тужбата е поднесена до Окружниот суд на САД за Северниот округ на Калифорнија. Тужителите наведуваат дека биле измамени да преземат и инсталираат лажна апликација наречена Sparrow Wallet, иако официјалната апликација за биткоин-паричник со тоа име не е достапна за оперативниот систем iOS.
Според наводите, тие ги префрлиле своите биткоини во лажната апликација, по што ги изгубиле средствата. Џејмс Рамирез изгубил околу 875.000 долари, Кристофер Елис околу 840.000 долари, а Џејлен Делгадо околу 120.000 долари.
Во тужбата се наведува дека Apple со години тврди дека App Store е побезбеден од конкурентските платформи бидејќи сите апликации минуваат низ строга проверка пред да бидат објавени. Според тужителите, компанијата со тоа создала чувство на доверба кај корисниците, кои очекувале дека нема да бидат изложени на измами преку официјалната продавница за апликации.
Дополнително, Apple е обвинет дека дозволил лажните верзии на Sparrow Wallet да останат достапни во App Store и покрај јавните предупредувања од креаторот на оригиналниот биткоин-паричник, Крег Роу.
Тројцата тужители бараат судење пред порота, надомест на изгубените средства и дополнителна отштета, како и Apple да воведе појасни предупредувања за ризиците поврзани со апликациите достапни во App Store.
Од Apple одбија да ја коментираат тужбата, но за TechCrunch изјавија дека апликациите што се претставуваат како други претставуваат прекршување на правилата на App Store и дека компанијата брзо ги отстранува кога ќе бидат откриени. Според Apple, во моментов во продавницата нема лажни верзии на Sparrow Wallet.
Компанијата посочи и дека во текот на 2025 година одбила повеќе од 371.000 апликации кои копирале други апликации, содржеле несакана содржина или на друг начин ги доведувале корисниците во заблуда.
