АПЛИКАЦИЈА

(Видео) Домче – дигитален дом за македонскиот јазик во дијаспората

Македонскиот јазик е темел на нашиот идентитет, а токму неговото зачувување кај најмладите во дијаспората е целта на новата апликација „Домче“ – прва дигитална платформа создадена специјално за македонски деца што растат надвор од татковината.Веб-верзијата на „Домче“ беше лансирана на 5 мај 2026 година, Денот на македонскиот јазик, со јасна порака – децата во Минхен, Чикаго, Сиднеј или Цирих… да не го заборават јазикот на своите родители, баби и дедовци. Наместо класично учење, „Домче“ нуди игри, приказни, брзозборки, сложувалки и интерактивни активности преку кои децата природно го учат македонскиот јазик и кирилицата.Кон крајот на мај, „Домче“ ќе биде достапно и како мобилна апликација на App Store и Google Play.Првите зборови што ги учат се „мама“ и „тато“, а содржината е прилагодена според нивото на секое дете – дали само разбира, малку зборува или веќе течно комуницира на македонски. Во апликацијата има 17 различни активности, инспирирани од македонската традиција, култура и семејни вредности.„Домче“ е создадено по истражување спроведено меѓу 374 семејства од дијаспората, кое покажало дека многу деца сè поретко го користат македонскиот јазик, а дел од нив чувствуваат и несигурност кога треба да зборуваат со роднините во Македонија.„Отворени сме за разговор со сите што се грижат за иднината на македонскиот јазик во дијаспората – родители, заедници, организации, институции. Слушаме повеќе отколку што бараме“, велат од „Домче“.Зад проектот стои тим од млади ентузијасти, поддржан од програмата „Имам идеја 3“ на Стартап Клуб Скопје. Само во првите два дена од лансирањето, повеќе од 100 семејства ја активирале апликацијата.Заинтересираните родители можат да се пријават преку официјалната страница www.domche.mk и да им овозможат на своите деца македонскиот јазик да остане жив дел од нивниот дом, без разлика колку далеку се од Македонија.Контакт-маил: kontakt@domche.mk

Магазин | пред 1 седмица

(Видео) AI хорор од Холивуд: апликација за разговор со починати шокира светот

Поранешниот актер на „Дизни“, Калум Ворти (34), се најде во центарот на жестоки критики поради својата нова апликација 2wai, која им овозможува на корисниците да создадат вештачки аватари на починати блиски лица. Актерот, познат по улогата на Дез Војд во серијата Austin & Ally, ја претстави апликацијата на социјалните мрежи, предизвикувајќи лавина од негативни реакции и дебата за етиката на технологијата што „ги оживува мртвите“.„Што ако можеме повторно да зборуваме со нашите сакани?“Во промотивното видео, Ворти ја опиша апликацијата како „жив архив на човештвото“, поставувајќи го прашањето:„Што ако луѓето што ги изгубивме можат повторно да бидат дел од нашата иднина?“Во рекламата се прикажува бремена жена која преку апликацијата разговара со AI реплика на својата почината мајка. „Дигиталната баба“ потоа му чита приказна на внучето, зборува со него по училиште и се потсетува на сопственото породување. Рекламата завршува со слоганот:„Со 2wai, три минути можат да траат засекогаш.“Корисниците на социјалните мрежи беа едногласни – апликацијата е морбидна. Многумина ја опишаа идејата како „демонска, неетична и дегуманизирачка“.Еден коментатор напиша:„Ако некој се обиде да ме рекреира по смртта, ќе го проколнам.“Други ја нарекоа „најлошата идеја во историјата на технологијата“, додека еден саркастично забележа:„Што ако едноставно престанеме да правиме некромантија со месечна претплата?“Многумина веднаш повлекоа паралела со серијата „Black Mirror“, особено со епизодата Be Right Back, каде вдовица создава дигитална верзија на својот покоен партнер. „Не разбирам каков тип претприемач гледа епизода на Black Mirror и вели: ‘Да, ова е бизнис идеја!’“ – напиша еден твитерџија.Апликацијата, достапна за iOS, создава „HoloAvatar“ – виртуелен лик кој изгледа и зборува како реална личност, врз основа на само троминутен видео-запис. Освен аватари на блиски лица, платформата нуди и готови модели, како личен тренер, астролог или готвач, па дури и аватари на историски личности – како Шекспир и кралот Хенри VIII.Компанијата, сепак, не објасни како со толку малку податоци вештачката интелигенција може реално да ја пресоздаде нечия личност. На прашањата од новинарите не одговорија.Оваа технологија отвора сериозни дилеми – дали е морално да се „оживуваат“ починати лица и кој поседува права над нивниот дигитален идентитет. Корисниците предупредуваат дека компанијата може да ги користи создадените аватари за огласување или комерцијални цели без согласност.„Замислете вашиот дигитален татко ви препорачува намалена цена на грав во маркет“, предупреди еден корисник.Психолозите, пак, стравуваат дека овие „дигитални воскреснувања“ ќе го попречат процесот на жалење и ќе создадат зависност од лажна утеха.Истражувачи од Универзитетот во Кембриџ предупредуваат на појавата на таканаречени „deadbot-ови“ – вештачки копии на починати што можат да предизвикаат психолошка траума. Тие опишуваат сценарија во кои дигиталните „духови“ испраќаат пораки, потсетници или реклами, па дури и комуницираат со деца, уверувајќи ги дека родителот „сè уште е тука“.„Овие услуги носат огромен ризик од анксиозност, особено ако луѓето се соочат со неочекувани дигитални контакти од шокантно верни AI реплики на своите најблиски,“ изјави д-р Томаш Холанек од Кембриџ.

Свет | пред 6 месеци