Странските возачи отсега ќе можат онлајн да ги проверуваат и да ги плаќаат казните од „Безбеден град“

Странските возачи отсега ќе можат електронски да ги проверуваат и да ги плаќаат сообраќајните казни евидентирани преку системот „Безбеден град“. Министерството за внатрешни работи информира дека е ставена во функција новата веб-апликација со мобилен интерфејс, наменета за сопственици и возачи на возила со странски регистарски таблички.

— реклама —

Преку апликацијата корисниците ќе имаат увид во сообраќајните прекршоци регистрирани со системот „Безбеден град“, издадените прекршочни платни налози, како и можност глобите да ги платат по електронски пат.

— реклама —

За да се најават, странските возачи треба да ја фотографираат или скенираат патната исправа и да ја внесат регистрацијата на возилото или возилата што ги користат во Македонија.

— реклама —

Од МВР посочуваат дека на овој начин возачите кои ќе бидат евидентирани дека направиле сообраќаен прекршок ќе можат навремено да се информираат и да ја подмират обврската, без дополнително задржување на граничните премини.

— реклама —

Воведувањето на апликацијата е дел од дигитализацијата на услугите поврзани со „Безбеден град“, а од МВР најавуваат дека во следните фази ќе бидат проширени и нејзините функционалности за други категории корисници.