Екипите на ЈП „Улици и патишта“ – Скопје в недела, на 7 јуни, со почеток од 08:00 часот, ќе вршат монтажа на нови портални семафорски столбови на булеварот „Александар Македонски“, кај пешачкиот премин во близина на бензинската станица „Макпетрол“.
Од претпријатието информираат дека на локацијата ќе бидат поставени и нови светлосни сигнали согласно одобрениот сообраќаен проект, откако постојните неодамна беа оштетени во сообраќајна незгода.
Работите ќе се реализираат во две фази. Во првата фаза, која ќе се изведува на страната од влезот во Скопје, возилата ќе бидат пренасочувани преку клучката кон Сингелиќ и Маџари.
Во втората фаза, која ќе се одвива на страната од излезот од Скопје, сообраќајот ќе биде пренасочен кон улицата „Благоја Стефковски“.
Од ЈП „Улици и патишта“ посочуваат дека на терен ќе биде поставена соодветна сообраќајна сигнализација и опрема, а ќе бидат ангажирани и редари за регулирање на движењето.
„Сообраќајот во неколкучасовен период ќе се одвива отежнато, но без целосен прекин. Апелираме до граѓаните за трпение и почитување на поставената сигнализација до завршување на работите согласно предвидената динамика“, информираат од претпријатието.
