Во пресрет на утрешниот концерт на Дејвид Гета во Националната арена „Тодор Проески“, организаторот и МВР апелираат посетителите навреме да пристигнат на стадионот и да ги почитуваат безбедносните насоки. Се очекуваат околу 50.000 посетители од Македонија и регионот.
Сопственикот на „Авалон продукција“, Бобан Милошески, порача дека замената на влезниците со нараквици била неопходна за концертот воопшто да може да се одржи.
„Ова со алките треба да се сфати како една неминовност за одржување на концертот во интерес на времето, поради инфраструктурата за влез каква што ја има стадионот“, рече Милошески.
Тој објасни дека проверката на класичните влезници би одземала многу време, а според него, без нараквиците голем дел од публиката не би можел навреме да влезе на стадионот.
Милошески ги повика оние што сè уште не ги замениле влезниците да го направат тоа, а сите посетители да пристигнат пред отворањето на вратите во 17 часот.
„Нема теоретска шанса 50.000 луѓе да влезат, да се приближат до стадионот ако тоа не се прави барем четири-пет часа. Во два часа тоа е технички невозможно“, порача тој.
Од МВР информираат дека е изготвен посебен план за физичко и сообраќајно обезбедување на настанот. Љупчо Ѓурчевски од СВР Скопје најави посебен режим на сообраќај на приодите кон арената и на дел од булеварот „Илинден“.
Началничката на униформираната полиција, Билјана Сарагинова, апелираше посетителите да ги почитуваат насоките на полицијата, редарите, приватното обезбедување и организаторот.
На концертот нема да биде дозволено внесување оружје, експлозивни материи, ножеви, палки, боксирачи, стаклени шишиња, алкохолни пијалаци и лименки. Од МВР советуваат посетителите да не носат ниту големи ранци и торби за да не се создава застој на влезовите.
