Премиерот Христијан Мицкоски и градоначалникот на Скопје, Орце Ѓорѓиевски, се огласија по настапот на светски познатиот диџеј Дејвид Гета во Скопје, кој беше дел од одбележувањето на независноста на Македонија.
Мицкоски оцени дека настанот имал значење кое го надминува музичкиот спектакл и дека вечерта била посветена на државата и на генерациите кои ја граделе.
„Ова не беше само голем музички настан, туку вечер во чест на Македонија, на нејзината независност и на сите генерации кои ја граделе и ја чувале државата“, напиша Мицкоски.
Тој им се заблагодари на сите кои учествувале во настанот, оценувајќи дека заедничкото одбележување покажало како се слави независноста.
„Благодарност до сите што беа дел од оваа прекрасна вечер и што заедно покажавме дека кога славиме за Македонија, славиме со срце, гордост и достоинство“, порача премиерот.
Мицкоски објавата ја заврши со порака за единство.
„Нека ни е вечна и независна Македонија, а ваквите моменти нека нè потсетуваат колку многу можеме кога сме заедно.“
По настапот се огласи и скопскиот градоначалник Орце Ѓорѓиевски, кој атмосферата во главниот град ја опиша со зборовите: „Скопје никогаш не било поубаво“.
„Центар на светот, на забавата и дружењето! Град што пулсира со радост, обединува и создава спомени за цел живот“, напиша Ѓорѓиевски.
Тој јавно му се заблагодари на премиерот Мицкоски и на Владата, како и на „Авалон“ за организацијата.
„Огромна благодарност до премиерот Христијан Мицкоски и Владата, како и ‘Авалон’ продукција за прекрасната организација и забавата што долго ќе се памети!“, порача Ѓорѓиевски, завршувајќи со: „Скопје, ова е твојот сјај!“
