Дејан Јованов – Деко, сопственикот на дискотеката „Пулс“ во Кочани, каде што во катастрофалниот пожар загинаа 63 лица, на 3 октомври треба да излезе од притвор бидејќи тогаш истекува максималниот законски рок во кој мерката може да трае, објави Телма.
Од Основниот кривичен суд – Скопје за Телма потврдиле дека последното продолжување на притворот на првообвинетиот Јованов важи до 3 октомври.
Причината е што обвинителниот акт бил оценет на 3 октомври 2025 година, а според законските одредби, притворот во оваа фаза може да трае најмногу една година од оценката на обвинението.
„Ве известуваме дека мерката притвор, определена против првообвинетиот Дејан Јованов, од страна на кривичниот совет е продолжена до 03.10.2026 година, имајќи предвид дека Обвинителниот акт е оценет на 03.10.2025 година и согласно законските одредби, мерката притвор може да трае до најмногу една година од оцената на актот“, велат од Кривичниот суд за Телма.
Од судот додаваат дека истекувањето на притворот не значи дека Јованов ќе остане без мерки за обезбедување присуство во постапката.
„Со цел да се обезбеди непречено присуство во понатамошниот дел од судската постапка, Судот, согласно досегашната пракса, по службена должност, по истекот на законскиот рок за мерката притвор, определува дополнителни мерки за претпазливост и обезбедување на обвинетиот“, соопштиле од судот за Телма.
Јованов беше приведен веднаш по пожарот во дискотеката на 16 март 2025 година, а притвор му беше определен на 23 март. Судењето против него и останатите обвинети започна во ноември и сè уште трае.
Како што објавува Телма, во предметот се обвинети и неговиот брат Тодор Јованов, на кого куќниот притвор му бил укинат откако понудил гаранција од околу 320.000 евра во недвижен имот, како и синот на Дејан Јованов, за кого биле определени мерки на претпазливост.
Извор:
Сопственикот на Пулс за неполн месец излегува од притвор, законот го ослободува по една година од обвинение - telma.com.mk
