Шпанската фудбалска репрезентација доби причина за загриженост пред финалето на Светското првенство, откако Ламин Јамал не тренираше со остатокот од тимот.
Младиот фудбалер на Барселона работеше по индивидуална програма, а шпанските медиуми објавија дека на левата натколеница носи заштитен завој. Загриженоста дополнително се зголеми бидејќи Јамал и во полуфиналниот натпревар против Франција покажуваше знаци на непријатност.
Сепак, првичните информации од шпанскиот табор се охрабрувачки. Според „Марка“, „АС“ и „Мундо депортиво“, не станува збор за сериозна повреда, туку за последица од големиот физички напор и заморот по полуфиналето.
Стручниот штаб, предводен од селекторот Луис де ла Фуенте, решил да не ризикува со еден од најважните играчи и му одредил индивидуален режим на работа за целосно да се опорави.
Според истите извори, се очекува Јамал да биде целосно подготвен за неделното финале и да му биде на располагање на селекторот во борбата за светската титула.
