Шпански аналитичари: САД и Израел ја искористија кризата во Сеута

Дел од шпанските аналитичари сметаат дека Соединетите Американски Држави и Израел ја искористиле кризата со масовниот прилив на мигранти во Сеута за дополнително да извршат политички притисок врз владата на шпанскиот премиер Педро Санчез.

— реклама —

Истражувачката Наталија Санча од Кралскиот институт „Елкано“ оценува дека Мароко би можело да се обиде да обезбеди јавна американска поддршка за своите територијални претензии кон шпанските енклави Сеута и Мелила.

Според неа, Рабат се чувствува охрабрен поради блиските односи со САД и Израел и ќе се обиде максимално да ја искористи актуелната ситуација. Таа додава дека во американската политика често претходат неформални политички сигнали пред официјални изјави, а прашањето за статусот на Сеута и Мелила веќе неколку месеци е присутно во јавните дебати.

— реклама —

Аналитичарите посочуваат дека дополнителна важност на регионот му дава и пренасочувањето на дел од поморските трговски рути по случувањата во Ормускиот Теснец, со што влезот во Средоземното Море, меѓу Сеута и Гибралтар, добива уште поголемо геостратешко значење.

— реклама —

Професорот Алехандро дел Ваље смета дека Шпанија не успеала доволно да ја вклучи Европската Унија во решавањето на кризата. Според него, Мароко има интерес проблемот да остане билатерално прашање, додека Мадрид требало да инсистира тој да стане тема меѓу Мароко и ЕУ.

Тој оценува дека доколку на границата во Сеута биле распоредени сили на Фронтекс, мароканските власти немало да дозволат илјадници луѓе да ја преминат границата.

— реклама —

Санча, пак, смета дека реакцијата на Европската Унија не била еднаква на одговорот што го даде во слични мигрантски кризи на источната граница на Унијата. Таа потсетува на случувањата од 2021 година, кога Белорусија беше обвинета дека ги насочува мигрантите кон Полска, оценувајќи дека сегашниот европски одговор бил значително послаб и понеусогласен.