Шпанските разузнавачки служби процениле дека мароканските власти не го организирале однапред масовниот влез на десетици илјади мигранти во Сеута, но свесно не го спречиле, овозможиле полесен пристап до границата и подоцна политички ја искористиле кризата, објави весникот „Ел Паис“.
Според информациите, не станувало збор за однапред испланирана операција на државниот апарат на Мароко, туку за ситуација што властите во Рабат решиле да ја искористат, пред настаните да излезат од контрола поради огромниот број мигранти и загинати лица.
Наводно, сè започнало со дезинформација што се проширила преку социјалните мрежи и апликации за комуникација. Лажната информација се темелела на неодамнешна пресуда на шпанскиот Врховен суд, која погрешно била претставена како доказ дека мигрантите што ќе пристигнат во Сеута нема да можат да бидат вратени во Мароко.
Сепак, пресудата не забранува депортација, туку се однесува на забраната за автоматско враќање на лица што пристигнале по морски пат без спроведување на законската постапка.
Според разузнавачките проценки, во деновите околу прославата на Денот на престолот во Мароко, контролата на мароканската страна од границата била значително намалена, а потоа речиси целосно повлечена. Тоа им овозможило на голем број луѓе да стигнат до граничниот премин Тарахал и да влезат на шпанска територија.
Подоцна, мароканските безбедносни сили распоредиле илјадници припадници на полицијата и почнале да ги запираат новите обиди за преминување со солзавец и водени топови.
Шпанските служби сметаат дека Мароко го искористил меѓународното медиумско внимание за повторно да го актуализира прашањето за Сеута и Мелиља – двата шпански града во Северна Африка врз кои Рабат има територијални претензии.
Во текот на кризата, повеќе од 50.000 луѓе преминале од Мароко во Сеута по копнен и морски пат. Шпанските власти соопштиле дека повеќе од 48.000 мигранти биле вратени во Мароко во рок од 48 часа, додека останатите се враќале во наредните денови.
Според последните информации, најмалку 72 лица загинале, најголем дел од нив при давење, а повеќе од илјада мигранти побарале медицинска помош.
Шпанскиот премиер Педро Санчез кризата ја оцени како напад врз територијалниот интегритет на земјата, но не го обвини директно Мароко дека го организирало масовниот влез. Во меѓувреме, Шпанија го засили присуството на полицијата и војската во Сеута и постави дополнителни безбедносни бариери долж крајбрежјето.
