Спасувачи спасија двегодишно девојче од давење во Грција

Двајца млади спасувачи успеале да спасат двегодишно и пол девојче кое вчера околу пладне било извлечено во несвест од морето на плажата Полихроно на Халкидики.

Како што објави грчкиот портал „Прототема“, спасувачите Атина Хоромиду и Танос Економу веднаш започнале со кардиопулмонална реанимација (КПР), откако добиле дојава дека детето е во животна опасност.

— реклама —

„Колегата доби повик дека детето е во неволја и веднаш истрча. Јас ја земав опремата и боцата со кислород, дотрчав до местото и во исто време повикав итна медицинска помош“, раскажа Хоромиду.

Таа објасни дека трипати извршиле КПР врз девојчето.

— реклама —

„Додека се подготвувавме да го употребиме дефибрилаторот, девојчето почна да повраќа и да плаче. Во тој момент знаевме дека е жива и дека успеавме“, изјави спасувачката.

Во интервенцијата помогнале и двајца волонтери од организацијата „Кидс спасува животи“, додека родителите на девојчето биле на местото на настанот.

— реклама —

Хоромиду рече дека детето било донесено на плажата без знаци на свест.

„Беше студена, посинета, а очите ѝ беа отечени. Во такви ситуации реагираме автоматски, благодарение на обуката. Дури подоцна сфаќате низ што сте поминале“, рече таа.

— реклама —

Според неа, најемотивниот момент бил кога девојчето се освестило, а посетителите на плажата ги поздравиле спасувачите со аплауз.

По укажаната прва помош, детето било пренесено во Здравствениот центар во Касандрија, а потоа и во болницата „Хипократ“ во Солун, каде што е хоспитализирано и се наоѓа во добра здравствена состојба.