Спречен увоз на 27,5 тони млеко од Косово поради зголемено присуство на афлатоксин

Агенцијата за храна и ветеринарство (АХВ) спречи увоз на повеќе од 27,5 тони УХТ млеко од Косово, откако лабораториските анализи покажале присуство на афлатоксин над дозволените концентрации.

— реклама —

Станува збор за две пратки со вкупна тежина од 27.520 килограми, кои биле задржани на граничниот премин Блаце. Млекото било наменето за продажба во синџир маркети во земјава, но по утврдувањето дека не ги исполнува безбедносните услови, не било пуштено на домашниот пазар.

— реклама —

Небезбедните количини, под надзор на официјален ветеринар, биле нештетно уништени на депонијата „Дрисла“.

Од АХВ информираат дека мострите биле земени како дел од Мониторинг-програмата за пратки со храна од животинско потекло што се увезуваат во земјава.

— реклама —

Агенцијата на 17 јули донела и решение со кое се воведуваат посебни безбедносни мерки при увоз на млеко и млечни производи, како и производи што содржат згуснато млеко или млеко во прав. Со мерките се засилени контролите и задолжителните лабораториски испитувања при увозот.

— реклама —

Од АХВ велат дека целта е на домашниот пазар да се пласираат исклучиво безбедни и квалитетни производи, но и да се обезбедат фер услови за домашните производители и заштита на потрошувачите.